नेकपा (एकीकृत समाजवादी) का दुई दर्जन बढी नेता माओवादी केन्द्रसँगको एकतामा सहभागी नहुने भएका छन् । ती नेता हुन्, पूर्वप्धानमन्त्री एवम् सम्मानित नेता झलनाथ खनाल, वरिष्ठ नेता घनेन्द्र बस्नेत, महासचिव घनश्याम भुसाल, स्थायी कमिटी सदस्यमा विजय पौडेल, रामकुमारी झाँक्री र जीवनराम श्रेष्ठ, पोलिटब्युरो सदस्य धर्मराज निरौला, लक्ष्मण लम्साल, शिव भण्डारी, अब्दुल हुसैन, अशेष घिमिरे, दामोदर अर्याल, नन्द बञ्जाडे, महेश रेग्मी र केन्द्रीय सदस्य आरती लामा, गौतम राई लगायत ।
उनीहरु चोचेमोचे एकताको विपक्षमा उभिएका छन् । एकीकृत समाजवादीका अध्यक्ष माधवकुमार नेपालले माओवादी केन्द्रका संयोजक पुष्पकमल दाहाल ‘प्रचण्ड’ सँग सहमति गरेर आजको केन्द्रीय समिति बैठकबाट एकताबारे औपचारिक निर्णय गराउने तयारी छ । नेपालले एकता गरे पनि आफूहरू नेकपा एस लाई नै अघि बढाउने पक्षमा रहेको उनीहरुले बताएका छन् ।
आजको केन्द्रीय कमिटी बैठकले माओवादीसँग एकता गर्ने निर्णय गरे पार्टी फुट्नसक्ने संकेत स्थायी समिति सदस्य झाँक्री, पोलिटब्युरो सदस्य दामोदर अर्यालले गरेका थिए ।
झाँक्रीले सामाजिक सञ्जालमा बिहानै लेखेकी थिइन, ‘व्यक्तिको आवश्यकता र व्यक्तिको संकट टार्न भएको एकता अनेकतामा विभाजित हुन सक्छ, इतिहासको वास्तविकता यस्तै छ। मान्छे नै थपेर बहुमत पुर्याउन त सकिन्छ तर त्यस्तो बहुमतले सबैको भावना बोक्छ भन्नेचाहिँ होइन ।’
त्यसैगरी अर्यालले लेखेका थिए, ‘मनोनीत गर्दै जानुहोस ! बहुमत सिद्ध गर्दै जानुहोस ! तर याद गर्नोस,कमरेड ! तपाईंको “कमिटी बहुमतले“ समाजको बहुमत सिद्ध गर्दैन । समाजमा हामी निरन्तर अल्पमतमा पर्दै गइरहेका छौ ।’