प्रधानमन्त्री केपी शर्मा ओलीले आज २३ असारमा प्रतिनिधिसभा बैठकलाई सम्बोधन गर्ने भएका छन् । बैठक दिउँसो १ बजे बस्दै छ । प्रधानमन्त्री ओली संयुक्त राष्ट्रसंघको विकासका निम्ति वित्तसम्बन्धी चौथो अन्तर्राष्ट्रिय सम्मेलनमा सहभागी भएर स्पेनको औपचारिक भ्रमणबाट फर्किएपछि आज प्रतिनिधिसभामा सम्बोधन गर्ने कार्यसूची तय भएको हो । ओली स्पेनबाट अस्ति २० असारमा फर्किएका हुन् ।
नेकपा (एमाले) संसदीय दलका मुख्य सचेतक महेश बर्तौलाले प्रधानमन्त्री ओलीले उक्त सम्मेलन र स्पेनको औपचारिक भ्रमणका विषय सदनलाई जानकारी गराउने कार्यसूची तय भएको बताएका छन् । प्रधानमन्त्रीले विदेश भ्रमणपूर्व र स्वदेश फर्किएपछि सदनलाई जानकारी दिने संसदीय अभ्यास छ ।